"ჩვენს მამას თავი დაანებეთ...უამრავი ადამიანი მზადაა, სისხლი დაღვაროს ეკლესიის სიწმინდისათვის"- თეოდორე გიგნაძე

  • 22 იანვარი 14:55

დეკანოზი თეოდორე გიგნაძე მიმართავს მათ, ვინ ეკლესიასა და პატრიარქს უპირისპირდება. მამაო ამბობს, რომ საქართველოს დედა ეკლესიას უამრავი მრევლი ჰყავს, რომლებიც მზად არიან მისი სიწმინდისტის სისხლი დაღვარონ. 

„უახლოეს წარსულს რომ გადავხედოთ, რომელიც ჩვენს თვალწინ მოხდა, მრავალი ფარისეველი ხელშემწყობი იყო ჩვენი ქვეყნის დაქცევისა. უმრავლეს მათგანს სახარებაც კი არ აქვს წაკითხული. ისინი დღეს ცდილობენ, ერთ ადამიანს ებრძოლონ, რამეთუ ეს ადამიანი, მათი გაგებით, საქართველოს კათოლიკოს-პატრიარქი, თავისი მსოფლმხედველობით, პასიურია. რომელიმე მათგანს თუ წაუკითხავს პატრიარქის ერთი ეპისტოლე?


ჩვენი პატრიარქი აქტიური საზოგადო მოღვაწეა. გარდა იმისა, რომ იგი სხვადასხვა პოლიტიკურ მოვლენებში მონაწილეობას იღებს, ნებით თუ უნებლიეთ, ზოგს სურვილი აქვს თუ არა, იგი აქტიური მღვდელმთავარია. ყოველთვის წირავს, იმდენს, რასაც ზოგიერთი მღვდელი არ წირავს, მათ შორის მეც. წირვა ფიზიკურად დამქანცველია, მით უმეტეს ასაკოვანი ადამიანისათვის, რომელსაც მძიმე ცხოვრება აქვს გამოვლილი. იგი ყოველ წირვაზე ქადაგებს და მოუწოდებს ერს. ეს ქადაგებები ტაძარში წირვაზე ისმინება. ეკლესიის მოწოდებას ყური დაუგდეთ, მოუსმინეთ და შეასრულეთ. პატრიარქი ყოველთვის ქადაგებს.


რას აკეთებს პატრიარქი? გამოდიან და დასცინიან. თუ ტაძარში არ მიდიხარ, როგორ გაიგებ? იცი საერთოდ, რა არის ქრისტიანობა, აღსარება, უფალთან ერთობა ზიარებით?


საქმე იმაშია, რომ გველი კი სისინებს, რომელიც ბრძენია, მაგრამ ეგ ბოროტი სიბრძნეა. უგუნურებასთან თანაზიარნი ვერ ხვდებიან, რომ პატრიარქთან ბრძოლას შედეგი არ ექნება. იმიტომ, რომ პატრიარქის უკან დგას ეკლესია. დღეს ეკლესიას იმდენი ერთგული შვილი ჰყავს, რომ მას ფიზიკურადაც ვერ დააჩოქებ. უამრავი ადამიანი მზადა, სისხლი დაღვაროს ეკლესიის სიწმინდისათვის, თავისუფლებისათვის. არავის მივცემთ უფლებას, ხელებით შეეხოს დედა ეკლესიას. ჩვენ მამას თავი დაანებეთ. ეკლესია ქრისტეს მისტიური სხეულია. რაც მეტად შეეხებიან წმინდა ეკლესიას ბინძური ხელებით, მით ძლიერად განიფერთხავს მათ. დღეს ეკლესია გაცილებით ძლიერია, ვიდრე გუშინ იყო“, –ამბობს თეოდორე გიგნაძე