გორის მერიის თანამშრომელი: ვისაც ეს პოსტი გულზე მოხვდა, ცივი წყალი დალიეთ

  • 5 აგვისტო 12:59

გორის მერიის ბავშვთა და ახალგაზრდობის ცენტრის უფროსი შმაგი ხუბულური გარდაცვლილი თამარ ბაჩალიაშვილის დედის თეონა თამაზაშვილის აშშ-ის საელჩოსთან გადაღებულ ფოტოს შემდეგი დასათაურებით აზიარებს: როგორც ჩანს, ნაცებმა სარალიძე 2 გამოაცხვეს... 

ხუბულურის ამ კომენტარმა საზოგადოების აბსოლუტური უმრავლესობის გაღიზიანება გამოიწვია, რომლებსაც პოსტის ქვემოთ კომენტარებში აფიქსირებენ. საპასუხოდ გორის მერიის თანამშორმელმა კიდევ ერთხელ დაწერა, თუ რა იგულისხმა თამაზაშივილის სურათის აღწერისას.


„ვისაც ეს პოსტი გულზე მოხვდა, ცივი წყალი დალიეთ. თუ ეგ არ გიშველით, გზა დიდია. ამდენ არაფრის მომცემ და უადგილო კომენტარებს აქ ვუპასუხებ. კი ვფიქრობდი არ მეპასუხა, მაგრამ გავითვალისწინე ქვეყანაში არსებული გარემოება, წაკითხულის გააზრების დონესთან დაკავშირებით და მაგან გადამაწყვეტინა. ეს მოკლე და ლაკონური პოსტი სულაც არ ნიშნავს იმას, რომ დაღუპული ახალგაზრდის და მისი ოჯახის მიმართ სოლიდარული არ ვარ. პირიქით ჩემთვის, როგორც ამ ქვეყნის მოქალაქისთვის ძალიან სამწუხაროა, როდესაც ადამიანები, მით უმეტეს ახალგაზრდები ასე იღუპებიან, მაგრამ ასევე ძალიან მნიშვნელოვანია ეფექტური და ობიექტური ჭეშმარიტების გამოვლენა, გამოძიება და თუ დამნაშავე არსებობს მისი უმკაცრესად დასჯა. როდესაც პირი, არ აქვს მნიშვნელობა ეს ვინ იქნება, დაღუპულის დედა, ბიძა თუ ნათესავი, პოლიტიკურ განცხადებას აკეთებს და ამბობს, რომ არჩევნების შემდეგ გამოვიძიებთო და უკეთესი ხელისუფლება გვეყოლებაო, ეგ პირდაპირ მიანიშნებს იმას, რომ საქმე კონკრეტულ შემთხვევაში გასცდა სამართლებრივ ჩარჩოს და გადაიქცა პოლიტიკურ სპეკულაციად. ჩვენ მსგავსი უამრავი ფაქტი ვიხილეთ ამ რამდენიმე წლის მანძილზე, მათ შორის სარალიძის საქმეზე. ვიხილეთ თუ როგორი გამოიყენეს შვილმკვდარი მამა ძალაუფლების ხელში ჩასაგდებად საბედნიეროდ მიხვდა ზაზა ვისთანაც ჰქონდა საქმე და დროულად ჩამოშორდა. ისიც კარგად ვიხილეთ თუ როგორ გადაუარეს შემდეგ ზაზას ამის გამო. სულ ახალი ფაქტია შაქარაშვილის და ვიხილეთ თუ როგორ ცდილობდნენ ეს ფაქტიც პოლიტიკურად გამოეყენებინათ მაგრამ ეყო წინდახედულობა მათ ოჯახს და ამ შავბნელი ძალის გადმოგდებულ ანკესს არ წამოეგნენ, ამის მერე თქვენ ნახეთ როგორ გადაუარეს ამ ოჯახს და საქმე იქამდე მივიდა, რომ სახალხო დამცველის დახმარებაც კი მოითხოვეს. ახლაც მსგავს ფაქტთან გვაქვს საქმე და ეს შავბნელი ძალა, რომელსაც დღეს ნაციონალურ მოძრაობას უწოდებენ ისევ ცდილობს ეს საქმე გამოიყენოს. სწორედ აქედან გამომდინარე ვთქვი, რომ ნაცებმა სარალიძე 2 გამოაცხვეს. ამდენი ჭიდილის შემდეგ ძლივს მოახრეხეს დაღუპულის ოჯახის წევრები პოლიტიკურ იარაღად გამოეყენებინათ და როგორც ჩანს შეძლეს“, - წერს ხუბულური.