ბატონო ბიძა, თქვენ პირველ რიგში ჭირისუფალი ხართ - გია ხუხაშვილი

  • 7 ივლისი 18:08

ექსპერტი გია ხუხაშვილი გარდაცვილილი გიორგი შაქარაშვილის ბიძის, მირიან ნიკოლაძის განცხადებებს ეხმაურება. 

როგორც ხუხაშვილი სოციალურ ქსელში წერს, მისთვის გაუგებარია, რატომ უნდა ებრძოდეს გარდაცვლილის ბიძა მათ, ვინც თუნდაც პოლიტიკური ინტერესის გამო, ჭირისუფლის მხარეზეა და სიმართლის დადგენას ცდილობს.


„ჩემთვის აუხსნელია, რატომ უნდა ებრძოდეს ხმალამოღებული გარდაცვლილის ბიძა იმათ, ვინც თუნდაც არასწორად, სპეკულაციურად, პოლიტიკური ინტერესით, მაგრამ მაინც ჭირისუფლის მხარეზეა. შეიძლება პარადოქსად მოეჩვენოს ვინმეს, მაგრამ ამ დროს სპეკულაციაც კი სიმართლის დადგენის ინტერესზე მუშაობს, რადგან მამაძაღლობის შანსს არ უტოვებს სისტემას.


ბატონო ბიძა, შეიძლება ბევრ შეფასებაში დაგთანხმდებოდით კიდევაც, მაგრამ არ დაგავიწყდეთ, რომ თქვენ პირველ რიგში ჭირისუფალი ხართ და მხოლოდ მერე ყველაფერი სხვა...“- წერს გია ხუხაშვილი.


ცნობისთვის, გარდაცვლილი ფეხბურთელის გიორგი შაქარაშვილის ბიძა მირიან ნიკოლაძე სოციალურ ქსელში შინაგან საქმეთა სამინისტროში გამართულ ბრიფინგს ეხმაურება და წერს, რომ თუ ექსპერტიზა გიორგის მიმართ განხორციელებულ ძალადობის ფაქტს დაადგენს, დამნაშავეების დანდობა არ იქნება.


„გიორგის გარდაცვალებიდან გავიდა 19 დღე, რომელმაც შეცვალა ჩვენი ცხოვრება ბევრი თვალსაზრისით. პირველყოვლისა, გიორგიმ თავის რამდენიმეღიანი არყოფნით უფრო მეტად გაგვზარდა სულიერად და მორალურად, ვიდრე ჩვენი ცხოვრების განვლილმა ათწლეულებმა.


ყველაზე მთავარი, რაც გიორგის არყოფნამ გვასწავლა არის ის, რომ საზოგადოების გარკვეულ ნაწილს სამართლიანობის განცდაზე დიდ მტერი არ ჰყავს და იგივე ნაწილი საზოგადოებისა შემდგომ მთელი სერიოზულობით მსჯელობს „ძალადობის აღმოფხვრაზე“.


შესაბამისად, კიდევ ერთხელ დარწმუნდა ოჯახი მის მიერ არჩეული გზის სისწორეში, რომლითაც არ მისცა საშულება ათასი ჯურის ავანტიურისტს ბავშვის გარდაცვალება გადაექცია პოლიტიკურ სკანდალად და სანახაობად.


რაც შეეხება, სამართლებრივ და ფაქტობრივ ვითარებას, მიუხედავად იმისა, რომ ყოველდღიურად ვიღაც ცდილობს ახალი „სკანდალის“ იმიტაციას, მიუხედავად იმისა, რომ დაბალი კვალიფიკაციის მქონე ადამიანთა ჯგუფები აწარმოებენ კარიკატურულ გამოძიებას, მიუხედავად იმისა, რომ ამ არასერიოზულობას ჰყავს მაყურებელიც და დამჯერებილიც, ამით არაფერი იცვლება. ვართ იმ წერტილში, სადაც ვართ და გვაქვს ის პესრსპექტივა, რომელსაც გარდაცვალების დღიდან ვაფიქსირებთ.


ახლა დგება ყველაზე საპასუხისმგებლო, ყველაზე მძიმე და ოჯახისთვის ყველაზე დამთრგუნველი ეტაპი, როცა უნდა გავიგოთ სიმართლე-რატომ მოგვიკლეს ახალგაზრდა, უდანაშაულო შვილი. ათასჯერ ვთქვი და კვლავაც გიმეორებ, რომ სასამართლო-სამედიცინო და გენეტიკური ექსპერტიზის დასკვნები არის ამ საქმის გასაღები და ამას ჩვენ ძალიან მალე ვნახავთ. თუ ექსპერტიზებით დადგინდა გიორგის მიმართ განხორციელბული ძალადობა და განზრახ მკვლელობა, მერე დამნაშავეების დანდობა აღარ იქნება!


ვთხოვ ყველას, თქვენი ძალისხმევა მოგვაშველოთ სიმართლის დადგენაში და არა სკანდალების გამოგონებაში (უკვე მეორედ მირეკავს გიორგის ატირებული დედა და მეკითხება: „რა დავუშავეთ ამ ხალხს, რატომ გვკლავენ ასე დაუნდობლად თავისი უპასუხისმგელობის გამოვო“, რა ვუპასუხო?!), მივმართავ დაკავებული და დაზარალებული პირების იმ ნაწილს, რომელთაც გიორგისთან ჰქონდათ ბოლო შემხებლობა-გამოიყენეთ ბოლო შანსი და თქვით სიმართლე, მეტი შანსი აღარ იქნება!


უღრმესი მადლობა ყველა ჟურნალისტს, სამართალდამცავს, მეგობარს, ნაცნობს და უბრალოდ გულშემატკივარს, რომელთა თანადგომა გვასულდგმულებს დღემდე, არ იდარდოთ ჩემს გამო, მე სიმართლის გარდა არასოდეს არაფერი არ მაინტერესებს!“- წერს მირიან ნიკოლაძე.