"ვითხოვ სამართლიანობას - ყველას, ვისაც 3000 ლარიანი ჯარიმა მიატყეპეს, გაუნულდეს, ან დაუბრუნდეს ფული"

  • 13 აპრილი 10:25

ფსიქოლოგი ნათია ფანჯიკიძე, კარანტინის, საგანგებოს და კომენდანტის საათის პირობების დამრღვევებისათვის გამოწერილი ჯარიმის გაუქმებასა და ფულის დაბრუნებას ითხოვს.

აღნიშნულის შესახებ ფანჯიკიძე სოციალურ ქსელში პოსტს აქვეყნებს, რომელსაც უცვლელად გთავაზობთ:


"რამდენიმე საათის წინ დავწერე და წავშალე, სამუშაო მქონდა და მაცდენდა, თვალი გამომირბოდა ფბ-სკენ. ახლა მოვიცალე და უნდა გავიმეორეო: რადგან ვერ დაიჭირავს კორონას გზა ვიწრო, ვერცა კლდოვანი, არ მწყინს ხალხი რომ თავისუფლად დადის, პირიქით, მშურს. ვითხოვ სამართლიანობას, - გაუქმდეს ჯარიმები.


ყველას, ვისაც 3000 ლარიანი ჯარიმა მიატყეპეს, გაუნულდეს, ან დაუბრუნდეს ფული. ერთისთვის კარანტინი და მეორესთვის არა, ეგრე არ გამოვა. "ყველა ერთად არ უნდა მოვკვდეთ, სასაფლაოზე არ დავეტევით და ჯერ სამოთხის კლასტერი, მერე განსაწმენდელის და მერე ჯოჯოხეთის მაშხალები ჩადექით რიგში" არგუმენტი არაა.
ხოდა, მანამდე "სუფთა სახლი" გახსენით, მასტიკა გამითავდა.


პ.ს. კიდევ რამეზე თუა საჭირო, რომ გავბრაზდე, მომაშველეთ თემები," - წერს ფანჯიკიძე.