ეკატერინე მიქაბაძე: ჭიათურაში, ასევე, გაიხსნება პირველადი დახმარების პუნქტი, რომელიც დასაქმებულებს შესაბამის მომსახურებას გაუწევს

  • 12 ივნისი 16:52, 2019 წელი

ეს განცხადება ეკონომიკისა და მდგრადი განვითარების მინისტრის მოადგილე ეკატერინე მიქაბაძემ მთავრობის ადმინისტრაციაში, ჭიათურის მაღაროს მუშებთან დაკავშირებულ საკითხზე გამართული მორიგი საკოორდინაციო შეხვედრის შემდეგ გააკეთა.

ჭიათურის მაღაროში დასაქმებულებს მაღალი სტანდარტებით აღჭურვილი საჩხერის საავადმყოფო მოემსახურება. 


მისი თქმით, ჭიათურელი მაღაროელებისთვის მიცემული პირობა დათქმულ ვადებში შესრულდება.


„დასაქმებულებს მაღალი სტანდარტებით აღჭურვილი საჩხერის საავადმყოფო მოემსახურება. ჭიათურაში, ასევე, გაიხსნება პირველადი დახმარების პუნქტი, რომელიც დასაქმებულებს შესაბამის მომსახურებას გაუწევს. შეთანხმება, რომელიც მიღწეულია, ის პირობა, რომელიც მიეცათ მაღაროელებს - დათქმულ ვადებში შესრულდება“.


როგორც ეკატერინე მიქაბაძემ აღნიშნა, გასული თვის ბოლოს ძალიან წარმატებით ჩაიარა მედიაციის პროცესმა.


„მიღწეულია შეთანხმება კერძო სექტორსა და დასაქმებულებს შორის, ბევრი საკითხი დადებითად გადაწყდა. იმ დროიდან ძალიან აქტიური მუშაობა და მონიტორინგი მიმდინარეობს არსებული პირობების შესასრულებლად. დღეს ამ მიმართულებით არსებული პროგრესი განვიხილეთ. ხელფასებთან დაკავშირებით შესრულდება ყველა ის პირობა და იმ დროში, რაც განსაზღვრული იყო მაისის ბოლოს. ასევე, განვიხილეთ კვებასთან დაკავშირებული საკითხები. უკვე გაიმართა ტენდერი, მუშების აქტიური ჩართულობით გამოვლინდა კომპანიები და ეს პროცესი, ფაქტობრივად, უკვე დასრულებულია“, - განაცხადა ეკატერინე მიქაბაძემ.


მისი თქმით, ეკონომიკის სამინისტრო სხვა ყველა უწყებასთან ერთად აქტიურად არის ჩართული ამ პროცესში.