ირაკლი ჩიქოვანი: გეგა შენგელია გამარჯვებისკენ მიდის

  • 19 მაისი 19:15

„ნაციონალურ მოძრაობას“ არ გამოუვა არც ზუგდიდის და არც ქვეყნის არევა“ - ამის შესახებ „ქართული ოცნების" ზუგდიდის საარჩევნო შტაბის ხელმძღვანელმა ირაკლი ჩიქოვანმა განაცხადა

ჩიქოვანის თქმით, მიუხედავად პროვოკაციების მცდელობებისა, ზუგდიდში საარჩევნო პროცესი დიდწილად მშვიდ გარემოში მიმდინარეობს და ამომრჩეველი აქტიურია:

„მოვუწოდებთ ჩვენს მოქალაქეებს, აუცილებლად გააკეთონ საკუთარი არჩევანი ზუგდიდის სასარგებლოდ. გეგა შენგელია არის ზუგდიდელების კანდიდატი. არჩევნების დასრულებამდე დარჩა კიდევ 2 საათი და ძალიან მნიშვნელოვანია, განვაგრძოთ ასეთი აქტიურობა.

სწორედ ეს არ დაუტოვებს შანსს ჩვენს ოპონენტებს მოაწყონ პროვოკაციები და არეულობა. „ნაციონალურ მოძრაობას“ არ გამოუვა არც ზუგდიდის და არც ქვეყნის არევა. ჩვენ ამას არ დავუშვებთ, ამას არ დაუშვებენ ზუგდიდელები. არეულობა და დესტბილიზაცია ზუგდიდში არ იქნება.

დარწმუნებულები ვართ, ნამდვილი დამკვირვებლები და საერთაშორისო ორგანიზაციები სათანადოდ შეაფასებენ „ნაციონალური მოძრაობის“ სრულიად გამაოგნებელ, პროვოკაციულ, დესტრუქციულ განცხადებებს და ქმედებებს", - განაცხადა ჩიქოვანმა.

ირაკლი ჩიქოვანი, ასევე, მოქალაქეებს მოუწოდებს, გაემიჯნონ არეულობის მოწყობის მცდელობას და ანტიდემოკრატიული შინაარსის მატარებელ ყოველგვარ გეგმას:

„მოვუწოდებთ ჩვენს მოქალაქეებს, ცალსახად გაემიჯნნონ არეულობის მოწყობის მცდელობას და ანტისახელმწიფოებრივი და ანტიდემოკრატიული შინაარსის მატარებელ ყოველგვარ გეგმას.

ნუ დაუპირისპირდებიან ხალხის ინტერესებს. ყველა დავიცვათ საარჩევნო პროცესს და ჩვენი მოქალაქეების უფლებას წყნარ, მშვიდ და თავისუფალ გარემოში გააკეთონ საკუთარი არჩევანი. დღეს, ზუგდიდი თავის სიტყვას იტყვის. გეგა შენგელია მიდის გამარჯვებისკენ.

უბნებზე გადაადგილებისას, ალბათ დაინახავთ, რომ კონკრეტული ადამიანები გაურკვეველ არასამთავრობო ორგანიზაციებს არიან ამოფარებულნი. ისინი ხელს უშლიან საარჩევნო პროცესის მიმდინარეობას. სამწუხარო ფაქტია ასევე ისიც, რომ მათ არ იციან საარჩევნო კანონმდებლობა კარგად. დარწმუნებულები ვართ, რომ შესაბამისი კომისიის წარმომადგენლები უზრუნველყოფენ ხმების სწრაფ დათვლას“, - განაცხადა ჩიქოვანმა.

დღეს 11 მუნიციპალიტეტში მერის რიგგარეშე, ან/და საკრებულოს შუალედური არჩევნები ტარდება. მერებს ირჩევენ მარნეულის, ზესტაფონის, ჭიათურის, ზუგდიდისა და ხულოს მუნიციპალიტეტები. თბილისი მთაწმინდის რაიონის მაჟორიტარ კანდიდატს აძლევს ხმას.