"ამდენი მშიერის წინ ტონაზე მეტი საჭმელი გადაყარეს" - აკა სინჯიკაშვილი

  • რეზონანსი
  • 31 იანვარი 10:09

ქველმოქმედი და სამოქალაქო აქტივისტი აკაკი სინჯიკაშვილი, რომელიც ხშირად სტუმრობს გაჭირვებულ ადამიანებს და მათთვის ხან საჭმელს, ხანაც სხვა სახის დახმარებას აგროვებს, საგანგაშო ფოტოს აქვეყნებს.

ფოტოზე ჩანს, ერთ-ერთი მარკეტის მიერ, როგორ იყრება დიდი რაოდენობით ვადაგასული პროდუქცია ნაგვის ურნაში. 

"ასე გააქვთ სუპერმარკეტებიდან და პირდაპირ ნაგვის მანქანაში ტენიან საჭმელს. გავიგეთ რომ ვადა აქვს გასული, მაგრამ თითქმის ყველაფერი საჭმელად ვარგისია, მით უმეტეს ისეთ ქალაქში, სადაც ასობით ადამიანი შიმშილობს და ნაგავში ეძებენ საჭმელს. ღამით მაინც გააკეთეთ ეს საზიზღარი საქმე, ამდენი მშიერის წინ ტონაზე მეტი საჭმელი გადაყარეს დღეს და კაცი მივიდა ერთი, მანქანაში არ შეყაროთ ცოტა ხანსო და პური, კარტოფილი და პომიდორი წაიღო. დანარჩენებმა ვერ მოასწრეს. ცალკე მაინც დაყარეთ სადმე, რომ ადამიანმა იპოვოს და რაც ვარგისია, შეჭამოს იმისთვის რომ ცოცხალი გადარჩეს. თითქმის ყველა ქსელი ასე იქცევა. ამის ყურება არ არის ძნელი, ძნელი მშიერი ხალხის ყურებაა, ტონობით საჭმელი რომ იყრება მათ თვალწინ!" - წერს სინჯიკაშვილი.

წყარო: რეზონანსი