გუგული მაღრაძე: ჭიჭინაძეს ჰგონია, რომ კოვზი რომელ ხელში უნდა დაიჭიროს, ეს არის ეთიკის კოდექსი

  • რეზონანსი
  • 21 აპრილი 23:35, 2018 წელი

საკანონმდებლო ორგანო პარლამენტრების ეთიკის კოდექსზე მუშაობას გააგრძელებს. კოდექსის ერთ-ერთი ინიციატორის გუგული მაღრაძის თქმით, დეპუტატებს უნდა ჰქონდეთ ქცევის წესები.

ამიტომ, მისივე თქმით, მიუხედავად იმისა, რომ ამაზე დიდი ხნის განმავლობაში მუშაობდნენ, მზად არიან ცვლილების განხორციელებისთვის.


ცნობისთვის, გუშინ პარლამენტმა დეპუტატების ეთიკის კოდექსი ჩააგდო. „ქართული ოცნების" წარმომადგენელმა დავით ჭიჭინაძემ კოდექსის გამო გუგული მაღრაძე გაარკიტიკა და აღნიშნა, რომ ამ ასაკში ადამიანებს ზრდილობა და ეთიკა შეძენილი უნდა ჰქონდეს.


„მგონია, რომ ადამიანი, რომელიც მაგ ასაკში იმყოფება, ეთიკა და ზრდილობა უკვე შეძენილი უნდა ჰქონდეს, რაღა დროს კოდექსებით ცხოვრებაა. პატარა ბავშვი რომ ვიყავი, მეუბნებოდნენ, მარცხენა ხელით არ ჭამო და კოვზი მარჯვენა ხელში დაიჭირე, უზრდელობააო. ასევე მასწავლეს, თავი თეფშში არ ჩაჰყოო. თუ ვინმეს პოლიტიკაში იმის გადმოტანა უნდა, პოლიტიკაში სად როგორ მოვიქცეთ - არ დავამთქნაროთ და კანონის მიღების დროს არ ჩაგვეძინოს", - აღნიშნა ჭიჭინაძემ.


მაღრაძე დავით ჭიჭინაძეს კოდექსის კარგად წაკითხვას ურჩევს.


გუგული მაღრაძე: ეთიკის კოდექსში არის ისეთი მუხლები, რომელსაც ზოგიერთი პარლამენტარი ეწინაღმდეგება, თვლის, რომ არ არის საჭირო ამ წესების დაცვა. ნაწილი კი თვლის, რომ დამატებითი რეგულაციები არ არის საჭირო.


„რეზონანსი": და კონკრეტულად რომელი ნორმებია თქვენი კოლეგებისთვის მიუღებელი?


გ.მ.: ბევრი რაღაცაა. იქ არის, თუ რა ტიპის ქცევები მოეთხოვება, რომ არ უნდა გამოიყენოს სიძულვილის ენა, შეურაცხმყოფელი გამოთქმები და არ უნდა გამოიყენოს თავის სამსახურეობრივი მდგომარეობა და სხვა.


დიდი მოცულების დოკუმენტია. ძალიან ბევრ ქვეყანას ევროპაში აქვს ასეთი კოდექსი. ყველა პროფესიონალურ ჯგუფს აქვს თავის კოდექსი, მაგალითად, ექიმებს, ჟურნალისტებს, იურისტებს და სხვა. ამიტომ გვინდა, რომ ასეთი ტიპის კოდექსი დეპუტატებსაც ჰქონდეს.


„რ": თუმცა, დეპუტატების ნაწილმა ამ კოდექსის გამო თავი შეურაცხყოფილად იგრძნო...


გ.მ.: ექიმები და იურისტები რა, ზრდასრფული ადამიანები არ არიან?! ყველა პროფესიონალურ საქმიანობას აქვს თავისი გარკვეული ეთიკური ნორმები. არის კანონი, რომელიც ყველასთვის სავალდებულოა და არის ეთიკის კოდექსი, რომელიც პროფესიიდან გამომდინარე გარკვეულწილად განსხავებულია.


ოლიმპზე ზემდგომები არ ვართ, ჩვენც ჩვეულებრივად ხალხის სამსახურში ვიმყოფებით. მიგვაჩნია, რომ ეს ხელს შეუწყობს უკეთესად განახორციელოს თითოეულმა პარლამენტარმა თავისი საქმიანობა.


ხშირად ამბობენ, რომ ამით თავისუფალი აზრის გამოხატვა შეიზღუდება, მაგრამ არ ვთვლი ასე - უბრალოდ, ფორმა უნდა მისცეს ისეთი, რომ სიტყვა არ იყოს შეუსაბამო შენს სტატუსთან.


„რ": მაგრამ დავით ჭიჭინაძემ ამის გამო გაგაკრიტათ კიდეც...


გ.მ.: ნუ, ჭიჭინაძეს თავის შეხედულებები აქვს. მას ჰგონია, რომ კოვზი მარჯვენა ხელში უნდა დაიჭიროს თუ მარცხენაში, რასაც სკოლაში ასწავლიან, ეს არის ეთიკის კოდექსი. კარგად უნდა წაიკითხონ ეთიკის კოდექსში რა წერია და იმის მიხედვით უნდა გამოთქვან თავის აზრები. ასეთი ვალდებულებაც ეკისრება სხვათა შორის პარლამენტის წევრს.


„რ": პარლამენტის თავმჯდომარემ განაცხადა, რომ ეთიკის კოდექსთან დაკავშირებით პარლამენტში ახალი ინიციატივა შევა...


გ.მ.: ეთიკის კოდექსში სანქციებთან დაკავშირებით იყო აზრთა სხვადასხვაობა. იქ არის ფულად ჯარიმებზე და პარლამენტის საიტზე გამოქვეყნებაზე, დელეგაციებში მონაწილეობის შეზღუდვაზე და სხვა. ამ სანქციებზე შეიძლება ვისმჯელოთ, გამოვკვეთოთ. მე-9 მოწვევის პარლამენტი თუ მიიღებს ამ კოდექს, ეს წინ გადადგმული ნაბიჯი იქნება.


„რ": ანუ, ახლა კობახიძესთან ერთად იმუშავებთ ამასთან დაკავშირებით?


გ.მ.: 6 ადამიანი იყო ამის ინიციატორი და ახლა ბატონი ირაკლი ჩაერთვება და ერთიანად შევეცდებით ამის გამოსწრობებას. ვკითხვათ და თუ რამე ახალს შემოგთავაზებენ, ან კარგი ფორმულირება იქნება, ჩვენ ღია ვართ ასეთი ცვლილებებისთვის.


თუმცა, ეს კოდექსი ძალიან დიდი ხნის ნამუშევარია, ჯერ კიდევ 2015 წელს დავიწყეთ ამაზე მუშაობა, როცა ღია და გამჭირვალე მმართველობის საბჭოს თავმჯდომარე ვიყავი. ახლა უბრალოდ სანქციები დავამატეთ.


ამაში უცხოელებიც იყვნენ ჩართული. ეთიკის კოდექსი ბევრ პარლამენტში, იგივე აშშ-ის კონგრესში ძალიან მნიშვნელოვანია.


ნამუშევარია ძალიან სერიოზულად, მერე ინიცირებულიც იყო, მაგრამ არ იყო სანქციების ნაწილი და ახლა რაღაცეები დაემატა და ძალიან დავხვეწეთ.


„რ": სანქციების დამატება `ოცნებაში" ბოლო დროს განვითარებულმა მოვლენებმა განაპირობა?


გ.მ.: სანქციების გარეშე ასეთი კოდექსები არ მუშაობს. ეს ყოველთვის საჭიროა, რომ ნორმამ იმუშავოს.

წყარო: რეზონანსი