კარანტინის დღეები: ენძელა მაჭავარიანი ზღაპრებს კითხულობს, გუგული მაღრაძე "სამეფო კარის თამაშებს" უყურებს

  • 8 აპრილი 13:56

ალბათ, ყველა ჩვენგანს ჰქონია, სურვილი ერთხელ მაინც სახლში გამოკეტილიყო და მთელი დღეები ფილმების ყურებაში, უზრუნველად გაეტარებინა.

მაგრამ ეს ადრე იყო… ახლა კი, როცა იძულებული ვართ, შინ ვიყოთ, ყველას გარეთ გასვლის სურვილი გვაქვს და ფილმების ყურებაც უკვე დიდად აღარ გვხიბლავს.


პარლამენტარი ენძელა მაჭავარიანი "ფორტუნასთან“კარანტინის მძიმე დღეების საინტერესოდ გატარების გზებს გვთავაზობს.


„კარანტინის ნორმებს ზედმიწევნით ზუსტად ვიცავ. შინ ვარ და სულაც არ ვფიქრობ, რომ იმის გამო, რომ მსოფლიოში საგანგებო მდგომარეობა, ადამიანები დეპრესიაში ან თუნდაც ცუდ განწყობაზე უნდა ვიყოთ. ვცდილობ, დიმიტრი უზნაძის განწყობის თეორიით ვიხელმძღვანელო.


ამ დღეებში ძალიან დავუმეგობრდი სოციალურ ქსელს. ასეთი აქტიური ფეისბუქზე არასდროს ვყოფილვარ. დღის განმავლობაში ვეცნობი უამრავ ინფორმაციას. საქმიანობასაც არ ვივიწყებ. ვცდილობ, მოვუსმინო და გავიგო ჩვენი მოსახლეობის გასაჭირი. მათთან მუდმივი კომუნიკაცია მაქვს. მათ პირველ რიგში ფსიქოლოგიურად ვეხმარები. ვეუბნები, რომ ცოტა ხანი უნდა გავუძლოთ ამ სიტუაციას და შეცვლილ სამყაროში ცხოვრებას ფეხი  უნდა ავუწყოთ.


ჩემი ხელფასის მესამედი კორონავირუსით დაზარალებულთა ფონდში გადავრიცხე. მესმის, რომ ეს ბევრი არაა, მაგრამ იმედი მაქვს, ვიღაცას ცოტათი მაინც დავეხმარე. მთავარია, სიკეთე გულით გააკეთო და მნიშნელობა არ აქვს, რამდენ ლარს გაიღებ ვინმეს დასახმარებლად.


კითხვა ყოველთვის მიყვარდა და ახლა, როდესაც სახლში ვატარებ მთელ დროს, ვცდილობ, ის წიგნები გადავიკითხო, რაც ერთ დროს ძალიან მომეწონა და რომელსაც ვიცი, რომ კარგი დასასრული აქვს. გადავიკითხე ზღაპრები, ვკითხულობ რევაზ ინანიშვილის მოთხრობებს, გოდერძი ჩოხელსაც მივუბრუნდი რამდენჯერმე და სხვებსაც ვურჩევ მათ წაკითხვას.


ჩემს დისშვილებთან ერთად ვატარებ ამ დღეებს. ფილმებს ნაკლებად ვუყურებ. ძირითადად ვიდეოგაკვეთილებს ვუყურებთ და მერე ყველა ერთად ვარჩევთ. იცით, არ არის რთული და, შეიძლება ითქვას, მარტივიც. ბევრი ახალი რამ გავიგე და ეს ძალიან კარგია.


უნივერსიტეტში სწავლის დროს ნოდარ ტაბიძეს ხშირად მივყავდით ლაშქრობებში. ერთხელ ერთ-ერთი ლაშქრობისას, როდესაც დაღლილები ვიყავით და სიარული გვიჭირდა, ნოდარ ტაბიძემ გვითხრა, არ იდარდოთ, ბრალი მას, ვინც ახლა სახლში თბილადაა, ჩენ ერთმანეთი უნდა გავიტანოთ და უნდა გადავლახოთ ეს გაჭირვებაო. მისი სიტყვები ამ ბოლო დროს ხშირად მახსენდება. ახლა ჩვენ ერთმანეთს უნდა გადავატანინოთ ის განსაცდელი, რაც მთელს მსოფლიოშია და ერთად დგომით ჩვენ ამას მოვახერხებთ.


პარლამენტარი გუგული მაღრაძე, დროის უმეტეს ნაწილს კითხვაში ატარებს. მისი თქმით, ახლა საუკეთესო დროა ახალი ტექნოლოგიების ასათვისებლად.


„ოჯახთან ერთად კიკეთში ვიმყოფები. კიკეთში ახლა თოვს, ყველაფერი ძალიან ლამაზია.  ცხოვრების ახალს წესებს ვემორჩილები.


დღის განავლობაში ბევრი საქმე მაქვს. თბილისის სახელმწიფო უნივერსიტეტის პროფესორი ვარ, სადაც ონლაინ ლექციები მიმდინარეობს და ყოველ დილით ლექციები მაქვს. კარგი დროა ახალი ტექნოლოგიების ასათვისებლად და ონლაინ ლექციები ამაში მეხმარება.


კარანტინის გამოცხადების შემდეგ მივხვდი, რომ უამრავი წიგნი დამიგროვდა, რომელიც აუცილებლად წასაკითხია. ახლა ვცდილობს, ბევრი დრო კითხვაში გამოვიყენო. ძირითადად ჩემი სპეციალობის, კონფლიქტლოგიაზე დაწერილ ლიტერატურას ვეცნობი.


ბოლო დროს ბევრმა თავისი ნიჭი კულინარიაში დაინახა, მაგრამ მე მათ შორის არ ვარ. ძირითადად ჩემი ქალიშვილი ამზადებს და მე შემფასებელი ვარ.


ბევრნი ვართ ოჯახში. ისეთი ფილმის არჩევა, რომელიც ოჯახის ყველა წევრს მოეწონება, რთულია. არჩევანი „სამეფო კარის თამაშებზე“ გავაკეთეთ, რომელიც დიდი ღირებულებით არ გამოირჩევა, მაგრამ შინაარსს მივყვებით და დღეებს ასე ვატარებთ “.


შეგახსენებთ, 31 მარტს საქართველოს მთელ ტერიტორიაზე საყოველთაო კარანტინი გამოცხადდა. საქართველოს პრემიერ-მინისტრის გიორგი გახარიას განცხადებით, კარანტინი მოვლენების განვითარების მიხედვით მოიხსნება.


წყარო