სოზარ სუბარი: ,,ნაციონალური მოძრაობის" მიზანია არეულობა შეიტანონ საარჩევნო პროცესში, თუმცა ვერ ეღირსებიან

  • 19 მაისი 15:42

„ქართული ოცნების" ერთ-ერთი ლიდერის სოზარ სუბარის განცხადებით, „ნაციონალური მოძრაობის“ მიზანია, ნებისმიერი არეულობის ფასად დაიბრუნონ დაძაბულობა, რასაც ვერ ეღირსებიან.

,,ერთადერთი ოლქი, სადაც დაძაბულობის მცდელობები შეინიშნება ეს არის ზუგდიდი, სადაც „ნაციონალური მოძრაობა“ ცდილობს, რომ ყველა უბანზე შექმნას გარკვეული დესტრუქციული ქმედებები და შექმნას დაძაბულობა.


დაძაბულობა რომ არის მათი მთავარი მიზანი, ეს კარგად ჩანდა მთელი წინასაარჩევნო პერიოდის განმავლობაში და დღესაც კარგად გამოჩნდა, როგორც მიხეილ სააკაშვილის განცხადებებიდან ისე იმ ჩანაწერებიდან, რომელიც ზუგდიდში ჩვენს გუნდს მიაწოდეს მათივე წარმომადგენლებმა.


კარგად გამოჩნდა, რომ მათი მიზანი არის არა არჩევნების სამართლიანად ჩატარება, არამედ მათი მიზანია, რამენაირად დაძაბულობა და არეულობა შეიტანონ, თუმცა გასაგებია რომ ამას ისინი ვერ ეღირსებიან.


აქვე მინდა განსაკუთრებული მადლობა ვუთხრა პოლიციას, რომელიც ძალიან ოპერატიულად რეაგირებს ნებისმიერ უმცირეს გადაცდომაზე და დარღვევაზე. შესაბამისად, სიმშვიდე არის შენარჩუნებული ყველა ოლქში. ერთი რამეს მინდა შევაგუო „ნაციონალური მოძრაობა“, რომ აღარასოდეს აღარ დაბრუნდება მათი დიქტატორული რეჟიმი საქართველოში და ყველგან, სადაც ისინი ეცდებიან აგრესია გამოიჩინო კიდევ ერთხელ ქართველი ხალხისა და ქართველი ამომრჩევლის მიმართ, მათ შესაბამის პასუხს გასცემს ქართული საზოგადოება", - განაცხადა სოზარ სუბარმა.